Lia Makloke
Tinan 13 Timor-Leste sai nudar país ida soberanu no independente. Hodi to’o ba iha objetivu ida ne’e, Timoroan tomak selu ho kustu boot no todan tebtebes. Timoroan rihun atus ba atus mak lakon sira-nia vida no moris, lakon buat tomak moris nian hodi sosa independénsia ida ne’e. Povu doben Timor-Leste hatudu duni korajen, dedikasaun, sakrifísiu, patriotizmu, eroizmu hodi hakotu ukun kolonializmu no okupasaun rejime militar invazor.
Iha faze ida ne’e nudar país soberanu no independente, Ita tomak sei no tenki lolo-liman ba malu, kahe-kabas ba malu hodi luta ba povu tomak nia moris diak. Iha tinan 13 nia laran, Timor-Leste halo progressu balu iha prosesu dezenvolvimentu nasional, maibé, tuir lolos, Timor-Leste bele halo barak no diak liután. Povu sai tiha fali objetu ba dezenvolvimentu, dezenvolvimentu hahu ho konsentra deit iha kapital. Tambá ne’e duni, PLP hamrik hodi hadia, hatur lolos papel povu aswa’in sira nian hodi sai sujetu ka autor ba dezenvolvimentu, no hala’o dezenvolvimentu husi knua, la’os husi kapital!.
Hafoin Timor-Leste restaura tiha nia independénsia, valor no prinsípiu sira hanesan solidarizmu, voluntarizmu liliu valor kultural sira sai mihis ba dadaun. PLP hamrik hodi revitaliza karákter, valor no prinsípiu sira be kesi metin Timoroan hodi bele hamrik metin nafatin luta kontra lala’ok neo-kolonializmu sira, atu nune’e, independénsia ne’e ba ema hotu no ema tomak.
PLP ofisialmente sai ona nudar forsa polítika ida iha loron 9 fulan Dezembru tinan 2015. PLP hamrik la’os deit atu harame palku polítika, maibé sei sai nudar espasu ida ba Timoroan tomak no sei sai forsa polítika alternativa hodi hatur didiak povu ida ne’e nudar povu doben ida dignu no estadu de direitu demokrátiku ida dunik.
Vizaun & Misaun
Valores no Prinsípiu
Seitor Prioridade ba Dezenvolvimentu
Lia Maktaka
Prosesu dezenvolvimentu nasional ohin-loron hahu no haleu deit iha kapital. Povu doben ida ne’ebé mak sai sujeitu ka autor prinsipal iha luta ba libertasaun nasional, maibé ohin-loron, sira sai tiha fali objetu. Tambá ne’e, PLP hamrik hodi hatur lolos prosesu dezenvolvimentu nasional hodi responde duni halerik povu kiak no mukit sira iha knua, iha suku. PLP hamrik nudar espasu no forsa polítika ida ba povu doben tomak hodi hisik kosar ba Timor-Leste nia moris diak!
Viva PLP!
Viva Povu Timor-Leste!
