Fidèlis Manuel Leite Magalhães  Porta-Voz Partidu. Fidèlis Manuel Leite Magalhães Porta-Voz Partidu.

“HAMETIN PAPEL PARTIDU POLITIKU HODI GARANTE PAZ NO ESTABILIDADE IHA ELEISAUN LEJIZLATIVA”

Jun 17

Dili, 16 Juñu, Oras nee ita tama iha momentu ida ne’ebé krítiku iha ita nia istória. Desizaun sira ne’ebé ita foti sei fó impaktu ba ita no ba jerasaun sira ne’ebé sei tuir mai. Pergunta ba sira ne’ebé luta iha tinan 24 nia laran ba ukun rasik aan, no sira ne’ebé servisu makas ba dezenvolvimentu durante tinan 17 nia laran maka nee:

Tempu hira tan mak ita tenke luta atu hetan moris di’ak ba ita nia povu?

Partidu Libertasaun Popular (PLP) hamriik atu responde ba pergunta nee. PLP hamriik, tanba momentu atu lori moris di’ak mak agora!

Iha tinan sanulu-resin hitu (17) nia laran buat balun mak ita halo ona. Maibé, buat barak liu mak seidauk halo, no balun ne’ebé halo ona presiza ita halo di’ak liu tan!

PLP harii iha loron 09 Dezembru tinan 2015. Oras nee PLP hamriik ona iha territóriu laran tomak. PLP halo ona ninia primeiru Kongresu Nasional husi loron 18-20 Maiu, 2017 liubá. Iha Kongresu nee PLP hili ona eiz-Prezidenti Repúblika Taur Matan Ruak nudar primeiru Prezidenti. PLP mós hetan ona aprovasaun husi Tribunal Rekursu hodi bele kompete iha eleisaun lejizlativa iha loron 22 fulan Jullu tinan nee.

PLP NIA HANOIN JERAL KONA-BA PAZ NO ESTABILIDADE

Ba PLP, ko’alia sobre harii paz no estabilidade iha rai laran, laos deit asuntu ida ne’ebé ita diskute durante tempu eleisaun deit. Maibé, PLP hanoin katak, ida nee tenke sai duni objetivu permanente ida husi partidu polítiku sira no sidadaun sira hotu nian. PLP fiar katak, sidadaun ida-idak, no liliu organizasaun polítika sira tenke kontinua servisu makas hodi asegura paz.

Ba PLP, Paz no Estabilidade la’os deit objetivu ida maibé kondisaun ida ne’ebé tenki iha atu bele dezenvolve ita nia rai doben.

PLP nia mehi atu halo Timor-Leste sai rai ida ne’ebé “RIKU, FORTE NO SEGURU”.

Atu hetan objetivu nee, ita tenke hametin Justisa, Direitus Umanus, no Demokrasia. No, PLP hakarak atu tau ita nia ema nudar sentru ba dezenvolvimentu no promove seguransa umana no dezenvolvimentu ekuitativu. 

PLP NIA HANOIN KONA-BA PAZ NO ESTABILIDADE IHA ELEISAUN LEJIZLATIVA

Paz no estabilidade durante eleisaun no legitimidade husi prosesu no rezultadu ba eleisaun nee sai indikador importante ida ba Konsolidasaun Demokrátika.

So nune’e mak ita bele hetan fiar husi ita nia povu rasik, no respeitu husi komunidade internasionál. Paz iha Eleisaun Lejizlativa mós sai sasukat ida ba kualidade husi ita nia institusaun demokrátika.

Hafoin ukun rasik aan, Timor-Leste halo tiha ona eleisaun lejizlativa dala rua (2007-2012). No, Eleisaun ba Assembleia Konstituenti dala ida (2001). Ho eleisaun tinan ne’e Timor-Leste halo ona eleisaun ne’ebé hili povu nia repzentante iha parlamentu ba dala 4 (se ita sura ho eleisaun ba Assembleia Konstituenti ne’ebé depois transforma ba Primeiru Parlamentu).

Durante períodu nee ita hare katak iha estatístika ne’ebé di’ak iha relasaun ho paz no estabilidade durante eleisaun. Se ita kompara 2007 ho 2012, 2012 di’ak liu no nune’e ita hein atu 2017 sei di’ak liu tinan sira antes.

Ba eleisaun ida nee, ne’ebé nudar primeira eleisaun lejizlativa ba PLP no primeira eleisaun ita halo la ho prezensa ONU, ami hakarak asegura sidadaun nian direitu demokrátiku, toleránsia, respeita no tane konsiderasaun as ba diferensa sira.

PLP hakribit violénsia no manipulasaun, kontra actus Hatun-malu  durante tempo kampaña, e mais importante wainhira hatene ona rezultadu ba eleisaun. 

Atu hakotu: PLP hamriik iha momentu importante iha ita nia istória. Tinan 6 tan ita kompleta ona 24 anos hanesan nasaun livre ida. PLP fiar katak, Paz no estabilidade mak xavi ba dezenvolvimentu. Maibé, PLP mós fiar katak atu hetan paz ita tenke hametin “justisa, direitus umanus no demokrasia”. Paz la’os konformidade. Paz katak ita selebra ita nia diferensa iha hanoin, haforsa ita nia rekursu sira iha ita hotu nian asaun konkreto ba ema hotu nia diak. Tanba, so nune’e maka ita nia nasaun bele sai forte no bele lori moris di’ak ba ita hotu, e laiha ema ida izoladu, husik hela iha kotuk, ou hases aan hosi proceso ida nee. Ita maka tenki Nain ba Paz, Paz hosi Ita, no ba Ita hotu.

 

Paz ba Timor-Leste!

Ba ohin, ba eleisaun lejizlativa no ba futuru!

 

Fidèlis Manuel Leite Magalhães

Porta-Voz Partidu

Read 1294 times Modifika iha loron Segunda, 19 Junu 2017 02:58