Presidente PLP Belun TMR hasoru malu ho grupu A-TMR. Presidente PLP Belun TMR hasoru malu ho grupu A-TMR.

KOMUNIKADU : TAUR MATAN RUAK AGRADESE APOIU A-TMR Featured

Jun 09

Dili, 9 Juñu 2017- Prezidente Partidu Libertasaun Popular (PLP), Belun Boot Taur Matan Ruak, agradese tebes ba grupu Amigu Taur Matan Ruak (A-TMR) ne’ebé iha inisiativa di’ak hakarak apoiu nia ba kargu Primeiru Ministru ba governasaun periodu tuir mai ne’e, 2017-2022.

“Ha’u hakarak fó parabens ba Amigus Taur Matan Ruak, ba imi-nia inisiativa ne’ebé hateten ami iha Partidu mais hakarak mai fó votus ba tinan ida ne’e ba maun Taur Matan Ruak nia Partidu.Obrigadu barak”, dehan Prezidente PLP, Taur Matan Ruak iha sorumutu nasional ida ho Grupu A-TMR ne’ebé mak hala’o iha Heli Portu Suku Bairo Pite, Dili, Kinta feira lokraik semana ne’e.

Eis Xefe Estadu ne’e mos fó razaun tanba sa hafoin sai hosi Xefe Estadu hili hodi tama ba partidu polítiku (PLP):“Se ba ha’u mesak de’it, Xefe Estadu ne’e naton ona ba ha’u, ha’u eis ona mas fulan-fulan toba de’it sei simu pensaum $2500.00, mas hanesan ohin Konsilleiru no Prezidente A-TMR i alin difisente oan hateten, i tebes ha’u la’o Timor laran, ha’u haree ho matan rasik ita-nia povu nia moris i entaun ha’u mai tanba hanoin imi, hanoin ita nia rain. Ha’u hanoin ita hamutuk para halo mudansa para rekursu fahe hanesan no oportunidade hanesan, tanba tinan hira nia laran riku la fahe hanesan i oportunidade mós la fahe. Tinan 15 to’o ona para ita halo mudansa haree hotu-hotu hanesan no oportunidade hanesan tuir idaida nia kbiit”.

Prezidente PLP mós klarifika liafuan iha liur ne’ebé hateten, ema ne’ebé halai hosi partidu ida ba partidu seluk ne’e hanesan ai kakeu no traidor, maibe tuir TMR katak ema sira ne’e mak hakarak duni mudansa ba nasaun ne’e, i ida ne’ebé tuur metin ne’e mak hakarak estatus quo ka lakohi mudansa no hakarak mate de’it iha bandeira hun. “I ha’u hateten ba ha’u nia ema PLP sira katak se tinan lima ne’e mak PLP ukun mak, ukun la diak, tinan lima mai halai fali ba ida seluk, tanba tempu ne’e osan-mean tenke aproveita didiak, selae ita fila ba fila mai mak ida ne’e, i ita la haree mudansa ruma”.

Komandnte ikus liu FALINTIL nian ne’e esplika liutan, iha pais sira osidental povu komesa ona baruk ho partidu sira antigu hodi ses an muda fali ba partidu foun ne’ebé iha inovasaun no hakarak halo mudansa, nune’e mós hanesan iha Timor-Leste, tinan 15 ona povu hakarak iha mudansa.

Iha sorumutu ne’e Prezidente PLP, Taur Matan Ruak esplika klaramente programa PLP nian ba A-TMR, ne’ebe sei sai hanesan plataforma partidu ne’e nian karik ukun sei implementa iha governasaun, i la’os hanesan partidu seluk nian ne’ebé iha kampaña ko’alia ida ba governasaun halo buat seluk.

Entretantu Prezidente A-TMR, Hugo Lorenco hateten, sira la’ós militantes PLP nian maibe sira mai hosi entidades oioin ho konfiksaun politika oioin ne’ebé kompostu hosi estudantes universitariu, akademiku, juventude, kampones grupu difisientes no timoroan sira ne’ebé mai ho hanoin ida hamaon an iha Amigu Taur Matan Ruak atu oferese sira-nia votus ba PLP nune’e atu lori Taur Matan Ruak ba Primeiru Ministru, tanba tuir A-TMR nia haree, Taur hanesan uniku figura ne’ebé iha hanoin di’ak, onestu, simples, vontade di’ak no dedikasaun as atu lori povu no nasaun ne’e ba oin hosi ukun tinan 15 ne’ebé hamosu de’it grupu elite balu mak benefesia ba ukun-an ida ne’e.

Iha sorumutu refere, Gurpu A-TMR kompromete ba Prezidente PLP, sira sei tun ba baze hodi akonsella inan-aman atu bele vota ba PLP hodi lori Taur Matan Ruak ba Primeiru Ministru.

Hola parte iha sorumutu nasional ne’e, Prezidente PLP ho estrturas nasional balun, Eis Komandante FALINTIL REZIAUN III, L-7, Konsileriu A-TMR, Jorge Teme, Prezidente A-TMR no amigu A-TMR liu ema 500.

Read 340 times Modifika iha loron Sabadu, 10 Junu 2017 22:16

Media