“Veteranu ida funu tinan 24 iha ai-laran  sira atu ba gusur, entaun ha’u dehan ba sira (governu), se imi gusur nia, ha’u mak sei hamrik iha estrada halo manifestasaun hasoru imi, entaun sira para tiha.  Iha Dili, orsida gusur komunidade ida tamba dehan katak, hela iha rai estadu. Ha’u dehan ba sira, sei la hasai povu sira sem kria kondisaun uluk. Tamba, ita haree sira ba gusur ema nia uma didiak fó $4000.00 de’it. Uma agora folin $4000.00? la iha. Entaun, ha’u kontra politika ida ne’e”, Belun Boot TMR klarifika hodi halo kestaun.

Tan ne’e, Eis-Prezidente (2012-2017) ne’e realsa katak, PLP nia programa, karik povu fo fiar, sei la halo eviksaun. Maibé, sei halo abitasaun ba komunidade sira ne’ebé hela iha areas urbana no fó subsidiu ba komunidade sira iha area rurais.

Prezidente PLP, Sr. Taur, mós espera katak, Xefe Estadu atual ne’e sei kontinua defende povu ki’ik sira hosi politika eviksaun obrigatoriu ne’ebé governu halo sem kria kondisaun uluk.

“Ita nia politika mak ne’e, ita sei la gusur ita-nia povu. Ba sira ne’ebe hela iha Dili, ita halo perumahan ba sira, pois sira ba hela mak selu neineik-neneik, se nia aman selu labele, nia oan kontinua selu, se nia oan selu la kotu, nia bei oan konitnua to’o uma ne’e sai sira nian. Tanba povu mak iha uluk mak harii estadu, nune’e estadu tenke respeita povu”, dehan Eis Major Jeneral Fitun rua ne’e.

Prezidente PLP, ga Komandante ikus liu FALNTIL ne’e mós esplika liutan,  “Ba ita-nia inan-aman  sira ne’ebé hela iha foho, ita sei fó subsidiu material konstruksaun nian ba sira.  

Nu’ud’ar izemplu, rai-henek governu tula gratuita, mas hanesan sementi, zinku, ai ou besi  governu subsidia. Se sementi saka ida $5.00 governu subsidia $3.00 no familia $2.00, se osan la iha bele troka ho animal ruma hanesan fahi ka bibi,  no ita ofrese fali animal hirak ne’e ba F-FDTL para sira han, hanesan ne’e mós ba besi, zinku no ai/baza.

Eis Xefe Estadu ne’e esplika, tipu atu halo uma iha zona rural,  tenke koordena ho Xefe Suku no Xefe Aldea, no modelu halo uma tenke serbisu hamutuk/gotong royong. Munisipiu Maliana hatudu ona izemplu diak balun oin’sa komunidade sira bele serbisu koperativamente hodi konstrui membru komunidade ida nia uma.

TMR esplika, programa refere hanesan kompromisu PLP nian atu implementa karik povu fo fiar PLP atu kaer ukun atu governa. 

~~~~~~~~ HOTU ~~~~~~~~