“Uluk ha’u mai hanesan Prezidente Repúblika, ohin ha’u mai fali hanesan Prezidente PLP i kandidatu Primeiru Ministru atu halo saída? Atu mai hasai tiha ema aat sira, ema sira ne’ebé ukun gaba an barak liu, ema sira ne’ebé ukun haree mak nia an barak liu, haree imi matan la moos no haree ha’u mós matan la moos”, dehan Eis Xefe Estadu, Taur Matan Ruak.
Hafoin, Eis-Jeneral ne’e mós esplika liutan katak, “Atu halakon goverasaun aat, saída mak ita tenke halo? PLP iha programa sia (9) ba ita nia nasaun. Maibe, la’ós programa atu halo aeroportu internasional, jalan tol no ponte boot (luxu) hanesan CNRT-FRETILIN nian. Mas, sé mak atu uza ita la hatene. Entaun, ita-nia programa ki’ik, maibe ne’e liga ba inan-aman sira nia moris loro-loron. Ita-nia oan jovem sira-nia moris, sira nia futuru. Programa iha surat ida ne’e (Manifestu Politiku)I ta-nia estrutura sira iha ne’e no Amigu Taur Matan Ruak espalla (fahe) ona ba inan-amans ira. Ita iha Programa 3 urujenti, no prioridades 7”.
Esplika klaru liútan mós katak, PLP nia programa mós mak, hakarak hadiak uluk estrada hosi Suku ba Munisipiu duke halo auto estrada.
“Sira (RAEOA) halo Oe-cusse vila funa-funan renda-renda, mas imi-nia Estrada iha ne’e ladi’ak, imi-nian iha Oe-cusse iha Aeroportu Internasional ida, maibe aviaun la iha. Imi-nia bee moos la iha, estrada la di’ak, uma kondisaun aat, ne’e oinsa? Abo Xanana nia aeroportu ida iha Suai minutu lima manu pombu ida sa’e minutu lima manu pombu ida tun. Maun Mari nian iha Oe-cusse minutu lima manulin ida sae, minutu lima manulin ida tun. La masuk akal, povu sei ki’ak hela, uma ladi’ak, bee moos la iha, eskola sira ladi’ak, mas sira halo uluk fali aeroportu internasional, jalan tol”.
Tamba ne’e, Prezidente PLP, husu ba militante no simpatizante PLP sira atu iha 22 Jullu vota loos ba PLP hodi bele halo mudansa ba governasaun ne’ebe durante tinan 10 ukun benefisia liuba sira-nia (balun) grupu. PLP hakarak governasaun ida ne’ebé ses an hosi korrupsaun no governu anti PensaunVitalisia.
“Tamba ne’e apa sira dalan la iha ona ba ita, dalan rua de’it, ou ita ba oin ou ita ba kotuk. Se imi hakarak ba kotuk hili CNRT ho FRETILIN, se imi hakarak ba oin hili PLP. Se imi hakarak aeroportu internasional no jalan tol hili FRETILIN-CNRT. Se imi hakarak hadi’ak imi-nia uma entaun hili PLP, se imi hakarak estrada halo de’it iha Oe-cusse para boot sira de’it mak la’o, hili FRETILIN, mas se imi hakarak hadi’ak uluk imi nia Estrada iha suku ba munisipiu entaun hili PLP! i ba uma hateten ba inan-aman ne’ebé dada bandeira FRETIIN no CNRT, se sira hakarak hela iha uma di’ak vota ba PLP. Sira lori kamijola mai simu de’it, lori osan mai simu de’it, mas kuandu ba vota, vota ba PLP tamba imi-nia naran la hakerek iha ne’eba atu vota ba sé? TMR esplika.
Hafoin remata kampaña taka, Prezidente PLP hamutuk ho nia komitiva sira dahur hamutuk ho simpatizante sira molok fahe malu.
~~~~~~~~~ HOTU ~~~~~~~~~