Bazeia fila-fali ba argumentu ida leten, PLP hakarak ho firme deklara katak, “PLP rejeita totalmente no informa ba públiku katak, akuzasaun ne’ebé maka partidu FRETILIN hato’o ne’e ‘Laloos. No husu mós ba instituisaun kompetente atu uza nia kompetensia tomak hodi verifika insidente refere urjentemente duke simu informasaun husi parte ida de’it”.

Informa mós katak, PLP respeitu diversidade ba direitu sidadaun sira nian atu votra, tamba PLP Timor Oan hotu nia partidu, sempre hako’ak Timor Oan hotu atraves nia programa, la’os atraves aktu terror no intimidsaun.  

Nune’e, Partidu Libertasaun Popular, PLP mós husu atu partidu istóriku ida hanesan FRETILIN atu la presiza fabrika no polítiza situasaun iha loron molok eleisaun atu hetan votus.

Hakarak atu informa mós katak, haktuir fali ba konfirmasaun ho pesoal tekniku iha kampo, PLP hakarak atu konfirma katak, kondisaun real no atual ne’ebe existi iha Postu Administrativu Laga maka katak, situasaun hotu la’o normal iha postu administrativu refere molok sidadaun Timor-Leste tomak hakat ba hato’o sira nia vota iha dia 22 Jullu.

Situasaun estrañu ne’ebé existi maka katak, oin’sa simpatizante partidu istóriku ida ne’ebé hetan votu maka’as iha parlamentu hetan fali ameasa husi PLP ne’ebé maka foun, no mós lidera husi Eis-Prezidente Repúblika ida hanesan Belun Boot Taur Matan Ruak ne’ebé iziji respeitu no disiplina husi nia membru estrutura, simpatizante sira iha Timor-Leste laran tomak. 

Ikus mai, PLP mós husu ba instituisaun kompetente atu tau atensaun ba kondisaun balun iha sidade laran iha ne’ebé atributu partidu polítiku balun nian sei tau nafatin iha fatin públiku wainhira periodu kampañe hotu hotu. 

~~~~~~~~ HOTU ~~~~~~~~