“Karik ita-nia partidu povu fó fiar atu ukun, ita sei tau osan kada tinan ba kada munisipiu durante tinan liman nia laran. Ita husu osan iha ka lae? Osan iha, tanba tinan lima ha’u hanesan Prezidente ha’u promulga $8 mil milloens resin. Maibe, osan hirak ne’e ba para iha Suai no Oe-cusse, Munisipiu seluk simu anin de’it”, Eis-Xefe Estadu dehan.
Señor Taur Matan Ruak hatutan katak, Governasaun PLP sei fó poder boot ba Munisipiu sira atu jere rasik sira-nia planu ba dezenvolvimentu, tanba sira iha ona osan.
SEI MUDA TIPU PENSAUN BA VETERANUS
Hakat fali ba asuntu selu, hato’o mós katak, karik PLP manan sei muda mós tipu pensaun ba veteranu sira, tanba modelu pensaun ne’ebé oras ne’e iha la fó benefisiu ba veteranus sira, i pelo kontrariu halo veteranu sira fahe malu no dependente ba estadu.
“Pensaun ida agora ne’e modelu ladi’ak, ne’e hanesan batar karik, ita fó ba sona han tiha, tempu udan monu rai husu tan fali. Entaun, PLP hakarak introduz modelu ida di’ak, katak batar ne’ebé fó ita-nia veteranus sira uza hanesan fini, ke halo veteranu manan, povu manan no estadu mós manan. Tanba, se ita mantein ida ne’e nafatin, ita sei susar I sei sai pezu boot ba estadu”, Eis-Komandante FALINTIL ikus nee hatutan.
Partisipa iha kampañe refere, estrutura hosi nasional balun, no estrutura hosi Munisipiu Bobonaro nian rasik. Wainhira remata ho kampañe, Prezidente PLP ho nia komitiva tomak dahur hamutuk ho simpatizante no/ga apoiante Partidu Libertasaun Popular husi Munisipiu Maliana tuir lisan no/ga tradisaun maubere nian.
~~~~~~~~ HOTU ~~~~~~~~