Kampaña PLP iha Uatucarbau, Viqueque. Kampaña PLP iha Uatucarbau, Viqueque. Foto PLP

TMR: GOVERNU IHA OSAN BA HALO JALAN TOL NO UMA ANDAR MAS LA IHA OSAN BA HALOT RESTUS MORTAIS, LA MASUK AKAL Featured

Jun 21

Viqueque, 22 Juñu 2017 – Prezidente Partidu Libertasaun Popular (PLP) Taur Matan Ruak liu hosi nia komisiu politiku iha Munisipiu Viqueue Villa Kinta feira semana ne’e  hateten la ‘masuk akal’ (labele komprende) wainhhira governu dehan la iha osan atu ba halot restus mortais ne’ebe familia sira rekolla iha fati-fatin iha Timor-Leste  laran tomak besik tinan 15 ona ne’ebe oras ne’e sei rai namkari de’it.

Prezidente PLP, Taur Matan Ruak, dehan ba militantes no simpatizantes PLP sira katak, “La masuk akal tinan 17 ita ukun an, ita nia restu mortais  sei soe namkari lemo-lemo, familia sira mak fera ulun, veteranu sira mak fera ulun ba halot. Sira ne’e uluk la ba na’ok ema nia ai-farina ka talas ruma mak mate iha ai-laran ne’eba, matebian sira mate defende ukun-an ne’ebe ohin ita mak goza. MaibéGovernu dehan osan la iha, be osan ba jalan tol iha, mas ba hakoi sira ne’e osan la iha? La masuk akal. Osan iha maibé sira mak la iha interese”,

Tanba ne’e PLP kompromete karik povu fó fiar kaer governu tuir mai,  sei tau assuntu ne’e  hanesan  programa urujente  govenru nian. Tamba, sira merese hetan fatin dignu hodi deskansa hakmatek.

Eis Xefe Estadu ne’e hatutan governu dadaun ne’e hanoin uluk mak boot hodi haluha tiha buat ne’ebe liga ba povu nia nesesidades loro-loron.

Iha kampañe parte dadersan iha Postu Administrativu Uatulari, Eis Gerileiru ne’e husu ba Uatulari oan sira atu hanoin didiak mak vota, tanba la’os ona tempu atu mate bandeira hun, tamba mate bandeira hun liu tiha ona.

“Dala ruma ita emosi, hanesan imi Uatulari, imi mate bandeira hun, mas imi-nia uma pregu monu hotu ona, zinku feruzen hotu ona, imi nia estrada ladiak, mate bandeira hun ba saída nian?

Iha parte seluk, Eis Xefe Estadu ne’e mós fó hanoin ba komunidade sira iha Postu Administrativu Uatulari hodi konta istoria sobre on’sa Nia (TMR) fó hanoin ba komunidade balun iha Quelicai katak, Prezidente PLP, TMR, mós uluk luta iha funu hodi defende Fretilin hanesan komandante durante tinan 24 iha ai-laran, no nia mós koñese momos familia hotu iha Uatulari, tanba durante funu Nia (TMR) mós subar iha Uatulari, entaun Nia hatene se-se de’it maka FRETILIN.

Eis Jeneral ne’e ikus mai lamenta sobre nia tristeza,  tanba hafoin tinan 17 ukun an la iha mudansa iha povu nia moris, hetok aat ba beibeik, nune’e Prezidente PLP, ga Eis-Prezidente Republika esplika ba komunidade sira hodi dehan:

“Ita funu hotu, imi mai fali sei moris nafatin hanesan ne’e, i moris pior liutan. Entaun, ha’u haree imi ha’u hanoin, nune’e ha’u mai iha PLP mai ho programa ida simples mas liga ba povu nia moris”.

Nune’e, TMR apela ba militantes no simpatizantes PLP sira atu labele vota sala iha loron 22 fulan Jullu 2017.

“Imi tenke hili partidu ne’ebé mai ho programa simple, mas liga diretamente ba imi nia moris loro-loron no ba imi-nia futuru. Desizaun ne’ebé imi sei hasai ne’e iha implikasaun ba tinan lima oin mai. Karik imi hili sala, labele fó sala ba sira ne’ebé imi hili ba ukun, maibé fó sala ba imi-nia an tanba hili sala ona. Votu ida ne’ebe imi tau nee mak sei determina nasaun ne’e nia future”, Prezidente PLP, TMR, hatutan.

~~~~~~ H O T U ~~~~~~

Read 848 times