Kampaña PLP iha Aileu. Kampaña PLP iha Aileu. Foto PLP.

TMR: “MATAN RUAK BRANI HASORU XANANA-MARI, TANBA UKUN LA DI’AK”

Jul 08

KAMPAÑA ABERTA IHA AILEU 

Aileu, 8 Jullu 2017 – Liu hosi kampañe aberta ba dala-17 iha Aielu Villa, Munisipiu Aileu, Sabadu  fin da semana, Prezidente PLP, Belun Boot Taur Matan Ruak, deklara ba militantes no simpatizantes PLP katak, iha Timor la iha ida mak brani ko’alia hasoru Xanana Gusmão no Mari Alkatiri ba ukun ne’ebé la di’ak, ukun ne’ebé benefisia liuba familia no grupu. 

“Iha Timor se mak brani hasoru Maun Xanana ho Maun Mari, la iha. Matan Ruak brani hasoru sira ba ukun ne’ebe la di’ak, ba ukun sira-nia familia de’it, tanba ne’e ha’u mai ho imi (PLP) ho hanoin ida de’it riku fahe, oportunidade fahe. Fahe oin’sa? Dezenvolvimentu tinan 15 konsentra de’it ba munisipiu rua, entaun ita nia mehi mak Munisipiu hotu hetan oportunidade hanesan tanba ne’e PLP hakarak tau osan ba kada munisipiutina-tinan $60 milloins para munsipiu bele uza ba dezenvolvimentu lokal.

Eis-Xefe Estadu ne’e realsa tan katak, “Primeira ves iha ha’u-nia vida tama partidu, i mai ta bik iha PLP, tanba saida ha’u la ba CNRT mai fali partidu foun ida ne’ebe foin harii? Tanba sa la ba FRETILIN? Ha’u la ba tanba sira foer hotu. Sira fó projetu ba feen no oan, fó projetu ba alin no maun, sira haluha tiha ema barak nia moris, sira haree liu sira-nia an duke imi (povu). Kuandu ha’u (sei) Prezidente, veta OJE, husu atu hasa’e ba edukasaun, hasa’e ba bee moos, ba toos-natar, ba saúde. Maibé, sira hotu kompak tiha kontra ha’u. Ohin, sira la’o tun, la’o sa’e, promote ba imi buat ne’ebe ha’u defende, sira mesak bosok ten de’it. Sira so harii de’it ema numeru satu numeru dua”.

Hafoin,   Komandante ikus FALINTIL ne’e mós subliña hodi dehan katak,  naton sei hanesan Xefe Estadu vizita suku rona povu nia halerik hodi lori ba governu atu buka tau-matan. Maibe, ui’toan mak governu tau-matan, i barak liu governu la tau matan. La’os tanba osan la iha, maibe governantes mak la iha vontade di’ak.

 “La halo la’os tanba osan la iha, maibe sira mak la iha vontade, tanba sira hanoin sira-nia an de’it. Sira halo dezenvolvimentu, sira gasta ita nia osan, sira hadau paun iha ita-nia oan nia liman soe tiha ba tasi. Bainhira imi-nia uma la di’ak, imi nia oan sira nia eskola la di’ak, bee moos la iha, maibé sira gasta ita-nia osan taka matan, uza no abuza ita-nia pasiensia”, TMR halo argumentu liútan tan.

Prezidente PLP, Señor Taur Matan Ruak ne’e mós konta istoria katak, Aileu nia naran boot iha tempu rezistensia,  fatin ba reisurisaun Armada FALINTIL. Tanba ne’e, hafoin funu hotu, TMR lori fali FALINTIL mai iha Aileu molok forma ho harii exerzitu F-FDTTL.

Informa mós katak, Dr. Abilio Araujo, ne’ebé maka hanesan mós Fundador FRETILIN nian ida, hamutuk ho membru estrutura nasional, inklui estrutura PLP Aileu nian mós partisipa ativamente ho entusiazmu iha kampañe refere iha Munisipiu Aileu nian.

 

~~~~~~~~ HOTU ~~~~~~~~

Read 4403 times Modifika iha loron Segunda, 10 Jullu 2017 14:37
|P|L|P|

Partidu Libertasaun Popular (PLP)

Website: https://plp.org.tl

Media

PLP