PREFÁSIU HUSI PREZIDENTE PARTIDU

Partidu Libertasaun Popular (PLP) harí ho Objetivu atu Liberta Povu husi Ki’ak no Mukit. Ida ne’e hanesan konsekuensia ida husi mehi ba ukun rasik an ne’ebé lori ona ita to’o liberta pátria ne’ebé tenke kompleta tan ho libertasaun lolos ba ita nia ema sira.

Tuir dadus ikus liu hatudu dezafiu boot ne’ebé agora dadaun ita nia nasaun enfrenta, mak liuliu iha metade husi ita nia populasaun sei moris iha nivel ki’ak 42% em termus monetariu no 48.3% kiak multidimensional, malnutrisaun iha 47%, no inseguransa aihan iha 36%, inklui nível dezempregu ne’ebé aas. Husi setor produtivu, ita nia produsaun sira rai laran lakonsege kore ita nia an hosi dependensia exesiva ba produtu importasaun. Ne’e lori nasaun ba iha nível frazilidade no dependensia ida extremu ba politika externa nasaun seluk nian.

Dezafiu hirak ne’e sai makaas liu tan wainhira instituisaun Estadu nian sira ne’ebé fornese edukasaun, saude, inklui apoiu setor produtivu rai laran sei frazil teb-tebes. Ida ne’e la ajuda ita atu rezolve kualidade edukasaun, saude no produsaun rai laran ne’ebé kiik rezulta ba dependensia esterna ne’ebé maka’as teb-tebes.

Atu bele hatan ba dezafiu sira iha leten ne’e mak ita inisia estabelesimentu Partidu politiku ida ne’ebé halibur ema hotu ne’ebé iha hanoin no mehi hanesan hodi bele fo kontribuisaun ba bem estar (moris di’ak) ema nian.

Ho ida ne’e mak Partidu Libertasaun Popular (PLP) kontinua konsolida nia-an internalmente hodi bele kontinua luta hamutuk ba libertasaun lolos ba ema Timoroan hodi bele moris saudavel, edukadu, prósperu, solidáriu no ho maneira sustentável. Manifesto Polítiku ida ne’e sei sai baze ba programa governasaun sira ne’ebé Partidu sei dezenvolve hodi kontribui ba dezenvolvimentu Povu, Nasaun, no Estadu.

Dili, 15 Fevereiru 2025

Jeneral Taur Matan Ruak

Prezidente