𝗣𝗿𝗲𝘇𝗶𝗱𝗲𝗻𝘁𝗲 𝗕𝗮𝗻𝗸𝗮𝗱𝗮 𝗣𝗟𝗣 𝗛𝗼𝗹𝗮 𝗣𝗮𝗿𝘁𝗲 𝗜𝗵𝗮 𝗞𝗼𝗻𝗳𝗲𝗿𝗲́𝗻𝘀𝗶𝗮 𝗣𝗮𝗿𝗹𝗮𝗺𝗲𝗻𝘁𝘂 𝗔𝗦𝗘𝗔𝗡 𝗻𝗶𝗮𝗻 𝗯𝗮 𝗗𝗶𝗿𝗲𝗶𝘁𝘂𝘀 𝗛𝘂𝗺𝗮𝗻𝘂𝘀 𝗶𝗵𝗮 𝗝𝗮𝗸𝗮𝗿𝘁𝗮, 𝗜𝗻𝗱𝗼𝗻𝗲́𝘇𝗶𝗮

Dili, loron 26 fulan-agostu tinan 2024 : Prezidente Bankada PLP, Deputada Maria Angelina Lopes Sarmento hamutuk ho Deputada hosi Bankada FRETILIN, Lidia Norberta Martins no Eis Deputadu António Desa Benevides, reprezenta Parlamentu Timor-Leste, partisipa iha Konférensia Parlamentu ASEAN nian kona-ba Diretus Humanus (DH) ho temátiku" Liberdade Religiaun no Fiar", ne'ebé realiza iha Jakarta, Indonézia hosi loron 24 to'o 25 fulan Agostu 2024.

Konferensia ne'ebé hola parte hosi Deputadus no Eis Deputadu Nasaun Membru ASEAN ne'e ko'alia kona-ba Nasaun sira iha regiaun ASEAN balu hasoru hela sirkustánsia oin-oin kona-ba diskriminasaun, violasaun no radikalismu ba religiaun hodi desvaloriza grupu religiaun minoria sira, ne’ebé kontribui ba violasaun DH hanesan direitu individu ba religiaun no fiar, inklui direitu atu promove no protege fiar indígena sira.

Nasaun sira balun iha ASEAN rekoñese katak fiar indígena seidauk hetan rekoñesimentu nuda'ar religiaun ida, tanba so bele rekoñese de'it religiaun boot lima ne’ebé rekoñese iha mundu, nune’e fiar indígena konsidera hola parte hanesan kultura la'os religiaun. Husi sorin seluk, extremismu no diskriminasaun ba komunidade musulmanu Ahmadiyah ne'ebé eziste tinan 100 resin ona, maibe sei kontinua hetan diskriminasaun. Nasaun balu uza lei Syariah hodi halo ema barak hetan perseguisaun, dezaparesimentu forsada, estigmatizasaun sosial, intoleransia no konservatismu religiaun kontinua prevalece. Tanba fragilidade ida ne'e Partidu Polítiku sira balu uza religiaun nuda'ar meius atu alkansa sira nia objetivu Polítiku no haklean liutan diskriminasaun ba religiaun minoria sira.

Iha paíz balu, religiaun Kristaun mós sai alvu ba diskriminasaun tanba Kristaun nuda'ar religiaun minoria. Nunee mós, nasaun balu depois de golpe ne'ebé akontese iha 2021, religiaun minoria sira hetan diskriminasaun liuhusi proibisaun ba hari fatin sagrado sira, bandu sira atu pratika sira nia fiar. Komunidade Rohingya hetan perseguisaun regime militar kontinua diskrimina no bandu sira atu hala'o movimentu.

Tanba tendensia violénsia no diskriminasaun kontinua buras, nuneé konferensia refere, halibur hamutuk deputadus no eis-deputados sira ne'ebé voz-ativa no hakarak promove no proteje demokrasia no DH, iha papel importante atu kontribui ba Estadu ida ne’ebé demokrátiku, iha transparénsia no akuntabilidade, kaer metin prinsipiu Deklarasaun Universal DH nian, hamutuk buka solusaun liuhusi halo Lei no Lejislasaun sira presizamente adere ba prinsípiu sira ne'e, iha nivel Rejionál buka hametin kordenasaun no haforsa rede parlamentares forte atu servisu hamutuk hodi promove no proteje DH, respeita liderdade religiaun no fiar, hodi nunee ASEAN bele sai komunidade ida ne’ebé DH sai sentru ba ASEAN nia aspirasaun politika no ekonomia.

Entretantu rezultadu husi konferensia ne'e mak aprovasaun Deklarasaun Jakarta kona-ba Promove no Proteje Liberdade Religiaun no Liberdade Fiar iha Regiaun Sudoeste Asiátiko (ASEAN).

[ ] Enkontru Estratéjiku ASEAN:

Além de konferénsia, Parlamentu ASEAN ba Direitos Humanos mós halao enkontru Estratéjiku ida hodi define planu estratéjiku organizasaun ne’e nian, ne'ebé be partisipa mós husi Deputada Maria Angelina Lopes Sarmento nuda'ar Membru Konselleiro (Board) Timor-Leste nian hahu iha V Legislatura (2018 - 2023 no 2023 - agora.

Parlamentu ASEAN ba Direitus Humanus nuda'ar organizasaun regional ne’ebé halibur deputadus atual no eis-deputados hosi País sira membru ASEAN nian,ne'ebé iha hanoin progresivu atu bele hala'o knaar nuda'ar reprezentante povo nian hodi bele integra prinsipiu sira kona-ba DH nian wainhira aprova Lei no Lejislasaun sira, kontinua halo advokasia ba assuntu sira kona-ba violasaun DH iha nivel nasionál, regionál no internasionál.

Enkontro Estretéjiku ida ne’e halao durante loron rua iha dia 25 -26 Agosto 2024. Objetivo husi Planu Estratéjiku ne’e mak atu halo fali revizaun ba vizaun, misaun, objetivu estratéjiku no objetivu organizasaun nian atu bele implementa iha periodu tuir mai. Dadaun ne'e ASEAN Parlamentar ba DH foka ba área temátika hanesan Demokrasia no Liberdade Fundamental, Liberdade Religiaun no Fiar, Mudansa Klimátika, Negósiu, Refugiadu no Traballador Imigrante, no Resposta ba Krize iha Myanmar.

HOTU