VENILALE, 22 Setembru 2024— Partidu Libertasaun Populár (PLP) kontinua halo atividade agradesimentu no Reajustamentu hodi hametin estrutura partidu iha baze, liuliu iha postu administrativu Venilale, munisípiu Baukau.
Iha atividade reajustamentu ne’e hetan prezensa husi Kordenadór PLP munisípiu Baukau, Belun Helder Freitas "Kamarudin”, Vise Koordenadór munisípiu Baukau, Belun Alfredo, Kordenadór KPM, Belun Sakunar no Kordenadór Fiskalizasaun, Belun Domingos.
Iha intervesaun, Koordenadór PLP munisípiu Baukau, Belun Kamarudin lori Prezidente PLP, Belun Boot Taur Matan Ruak, ho estrutura tomak nia naran agradese ba estrutura postu administrativu Venilale rasik, estrutura suku, aldeia, apoiante no simpatijantes hotu, ne’ebé durante ne’e fó apoiu ba PLP, inklui fundadór ba ejisténsia partidu PLP nian.
Aleinde ne’e enkoraza kuadru sira ne'ebé simu kna'ar iha estrutura partidu nian kontinua servisu hamutuk ba vida organizasaun nian iha postu administrativu Venilale.
Iha sorin seluk Kordenadór KPM, Belun Sakunar, husu mós ba estrutura husi nasionál to’o suku no aldeia kontinua konsolida malu ba susesu PLP nian iha futuru, tamba ne'e hotu-hotu presiza iha vontade ba servisu populár, ne’ebé importante ba ema hotu.
Partisipa iha serimónia agradesimentu no reajustamentu estrutura ne’e husi estrutura suku 8 iha Venilale, órgaun asosiadu sira, militante no simpatizante sira.
#Media PLP-Baukau
