𝗗𝗲𝗸𝗹𝗮𝗿𝗮𝘀𝗮𝘂𝗻 𝗣𝗼𝗹𝗶́𝘁𝗶𝗸𝗮 𝗕𝗮𝗻𝗸𝗮𝗱𝗮 𝗣𝗟𝗣 𝗜𝗵𝗮 𝗔𝗯𝗲𝗿𝘁𝘂𝗿𝗮 𝗜𝗜 𝗦𝗲𝘀𝗮𝘂𝗻 𝗟𝗲𝗴𝗶𝘀𝗹𝗮𝘁𝗶𝘃𝗮 𝗯𝗮 𝗩𝗜 𝗟𝗲𝗴𝗶𝘀𝗹𝗮𝘁𝘂𝗿𝗮 𝗣𝗮𝗿𝗹𝗮𝗺𝗲𝗻𝘁𝘂 𝗡𝗮𝘀𝗶𝗼𝗻𝗮́𝗹 𝗻𝗶𝗮𝗻

𝗗𝗲𝗸𝗹𝗮𝗿𝗮𝘀𝗮𝘂𝗻 𝗣𝗼𝗹𝗶́𝘁𝗶𝗸𝗮 𝗕𝗮𝗻𝗸𝗮𝗱𝗮 𝗣𝗟𝗣 𝗜𝗵𝗮 𝗔𝗯𝗲𝗿𝘁𝘂𝗿𝗮 𝗜𝗜 𝗦𝗲𝘀𝗮𝘂𝗻 𝗟𝗲𝗴𝗶𝘀𝗹𝗮𝘁𝗶𝘃𝗮 𝗯𝗮 𝗩𝗜 𝗟𝗲𝗴𝗶𝘀𝗹𝗮𝘁𝘂𝗿𝗮 𝗣𝗮𝗿𝗹𝗮𝗺𝗲𝗻𝘁𝘂 𝗡𝗮𝘀𝗶𝗼𝗻𝗮́𝗹 𝗻𝗶𝗮𝗻

16 Setembru 2024

Ex.mo Sr. Prezidente Repúblika Dr. José Ramos Horta

Ex.mo Sra. Prezidente do Parlamento Nasional

Ex.mo Sr. Primeiro Ministro e membros do governo

Ex.mo Sr. Prezidente Tribunal Rekursu em ezersísiu

Ilustres deputados

Reprezentante Santa Sé iha Timor-Leste no Corpos Diplomátikos

Distintos konvidados

Povo doben Timor-Leste

Dala ida tan, Timor-Leste hetan atensaun hosi komunidade internasional liuhosi vizita hosi Dr. António Guterres – Sekretáriu Jeral Nasoins Unidas ho bainaka espesial sira neébé hola parte iha prosesu libertasaun nasional inklui grupo solidariedade sira iha komemorasaun ba Loron Konsulta Popular ba dala 25 iha 30 Agosto 2024. Vizita ida-nee, hamutuk ho vizita hosi Sua Santidade Papa Francisco hosi 9-11 Setembro 2024, hatoó mensagem sira neébé forte tebes ba Povo Timor-Leste.

Mensajen xave rua neébé Timor-Leste bele hetan estrai hosi eventu signifikativu sira neé: Povo mak interveniente prinsipal iha ezersísiu direitu auto-determinasaun ba Timor-Leste nian liuhosi part isipasaun korajoza iha konsulta popular iha 30 de Agosto 1999 no luta ba libertasaun nasional neé profundamente abut forte iha kultura Timor-Leste, neébe iha parte balu sai ona nu’udar fiar hosi povo Timor-Leste. Tan neé, lema hosi Papa Francisco nia vizita QUE A VOSSA FÉ SEJA A VOSSA CULTURA mak nu’udar konfirmasaun ida ba realidade ida neé.

Vizita husi Papa Francisco iha Timor-Leste mós apela ba autoridade sira kompetente atu tau-matan ba Povo Timor-Leste, halo sira haksolok, espesialmente tau-matan ba labarik, joven sira, feto, katuas-ferik, no ema ho defisiensia.

Maski nune’e, Povo Timor-Leste ohin loron sei hasoru dezafiu oin-oin iha konstrusaun Estado no Nasaun, hanesan pobreza, inseguransa alimentar, kualidade edukasaun neébe baixa, kreximentu ekonómiku ne’ebe fraku, falta aimoruk ne’ebe rezulta Povo barak mate, partidarizasaun funsionalizmu públiku, korrupsaun, presipísiu fiskal, no selseluk tan.

Além de dezafiu sira iha leten, Timor-Leste sofre mos hosi “kultura oioin ne’ebé invade Rai Doben ida ne’e, hanesan edonizmu, konsumizmu, liberalizmu, individualizmu, no demóniu ka “lafaek” selseluk tan, hodi uza metafora ne’ebé Papa Francisco temi.

Nune’e, ho vizita hosi Dr. António Guterres no Sua Santidade Papa Francisco, dala-ida tan, Timor-Leste presiza renova sira-nia kompromissu atu konsolida no konfirma ninia unidade iha luta hasoru dezafiu foun sira neé, serimonial no eventos remata ona, ita laos orgulho deit ho evento boot sira hodi basa liman, euphoria no kontenti, maibe realidade iha povo nia moris lor-loron sei halerik no tanis atu moris no goza iha rai ida ne’bé livre no independenti ona.

Sua Santidade Papa Francisco figura mundiál ida ne’ebé simples, moris iha moderasaun, no lori ksolok no esperansa ba ema seluk, espesialmente ba sira vulnerável. Nune’e, ho vizita hosi Sua Santidade Papa Francisco, ita hotu enkorajadu atu banati-tuir ninia simplisidade, moderasaun, no sai mensajeiru ksolok no esperansa nian ba ema sira ne’ebé ki’ik no ki’ak.

Tan neé, Partido Libertasaun Popular (PLP), iha ámbito Abertura Segunda Sessaun Lejislativa da Sexta Lejislatura 2024-2025, hakarak rekomenda ponto balun hanesan tuir-mai neé atu:

1. Órgaun soberano sira defende nafatin interese konstitusionál atu lori bem-estár ka moris-diak Povo Timor-Leste liuhusi seriedade iha luta kontra pobreza iha ninia dimensaun oioin, nudar ajenda prinsipal etapa 25 anos tuir-mai;

2. Prezidente Repúblika promove diálogo no rekonsiliasaun entre kamada oioin iha sosiedade Timorense hodi garante unidade nasional iha luta kontra “inimigo” foun sira hanesan pobreza, obskurantizmo, insustentabilidade fiskal, jogu jeo-polítika global no rejional ne’ebé la-favorável ba rai kiik hanesan Timor-Leste;

3. Parlamento Nasional bele proativo liután hodi halo projeto lei oioin ne’ebé nesesáriu hodi lori moris-diák ba Povo Timor-Leste no dezempeña ninia funsaun nu’udar fiskalizador loloos ba Akto Governo inklui fiskalizasaun ba ezekusaun orsamento relasiona ho vizita Sua Santidade Papa nian, hodi garante demokrasia ida ne’ebé vibrante iha Timor-Leste.

4. Governo adopta no kria kondisaun oioin ne’ebé nesesáriu hodi respeita dignidade no direito umanu Timorense, promove atuasaun sira ne’ebé bazeia ba abordajen direitu umanu nian no dezenvolve programa oioin ne’ebé hatur Povo Timor-Leste nu’udar sentru ba dezenvolvimento.

5. Governo investe iha labarik no joven sira, nu’udar jerasaun kontinuadór ka erdeiru istória lutadór Timor-Leste nian hodi reativa fali bolsa da mãe Nova Geração no bolsa estudo oioin hodi eleva sira-nia abilidade no kapasidade hodi sai kriativu no produtivu liután iha perkursu dezenvolvimento nasional Timor-Leste.

6. Governo Timor-Leste adopta no introduz dokumento seluk hosi Papa Francisco hanesan Fratelli Turri no Laudato Si, hamutuk ho Fraternidade Humana iha instituisaun edukasaun oioin hodi nune’e promove valór koezisténsia iha pás, toleránsia, respeito ba dignidade umana, moris iha moderasaun ka simplisidade, no prezervasaun rasa umana no sustentabilidade hosi planeta Rai.

Mai ita kombate injustisa, pobreza, tiránia, no degradasaun ambiental. Hamutuk, mai ita haburas “kultura” moris hamutuk iha domin no dame, tane malu nu’udar maun-alin, respeita malu, sai solidáriu nafatin ba malu, tuir naroman fé nian.

Obrigada.

Maria Angelina Lopes Sarmento

Deputada no Prezidente Bankada PLP